1 - اليوم قررت ننخرط في العمل السياسي، هو قرار صعيب و بقيت برشا نخمم قبل ما ناخذو و أعي جيدا كبر المسؤولية
2 - لست ليبرالي و لست متوحش ، و في افاق تونس نؤمنوا بدولة قوية في مجالاتها، بأمن و دفاع وطني قويين، بجيش جمهوري، بصحّة و تعليم، تربية و نقل، بحث علمي و ثقافة و هذا الكل مش بدولة، في نفس الوقت تملك شركات مغرّقتها و بتسيير مش بالطريقة اللازمة و داخلة في مياديين ملزمهاش تكون داخلة فيهم
3 - أولويات تونس اليوم محاربة الفقر و إعادة الأمل لشباب تونس
4 - الخير تحت ساقينا و أحنا رجعنا نحكيو في حكايات فارغة متاع عشرة سنين التالي على الهوية التونسية
5 - أنا مواطن مسلم عربي افريقي متوسطي و فخور بهذا و تجاوزت حكاية اللّي يتزايدو بالدين و اللّي يتزايدو بالوطنية وحتى حد معندو الحق يتزايد بالدين ولا بالوطنية
6 - مشروعنا السياسي وسطي، ميستعملش العنف، ينادي بدولة مدنية، بدولة تِتلها بأولادها
7 - الحزب السياسي هو مشروع أفكار و برامج مش كلام فضفاض و شعارات جوفاء ما يفهمها حتى واحد، و كلام مبني للمجهول، و ناس تعيط و تصيح و تتعارك في مجلس نواب الشعب
8 - كي حكيت على جرّة قلم، فما برشا ناس قالو جاي باش يعمللنا فيلم متاع سحّار
9 - أنا نؤمن اللّي اليوم تونس مازالت محكومة بقوانين عام 30 و 40 و 50 و 60 اللّي معادش تتماشى و الظرف الحالي والدولة اليوم هي بيدها اللّي معطلة الاستثمار بتراتيب ترجع للدولة العثمانية و الاستعمار و دولة الاستقلال اللي يمكن كان صالحين في وقتها أما توّة معادش
10 - 365 ألف هكتار نتفرجو فاهم و مش فاهمين شنعملو بيهم و نستغلو في 30% من سدودنا خاطر مجهرناهمش عنا شنوات و من مبعد نقولو كيفاش معناش ماء وكي تحط فصل في الدستور الماء حق، متحلش أزمة الماء
11 - اليوم لازم تتحرر الطاقات في تونس، الأراضي الفلاحية تنجم تولي جنة على الأرض و الدولة لازم تموّل الفلاحة
12 - البنك الوطني الفلاحي معندو مالفلاحة كان الاسم
13 - علينا ترتيب البيت التونسي و في افاق عنا عباد تعرف تونس وعنا حلول عملية و برامج لتونس
14 - العزيمة كبيرة و الحماس كبير و خذيت عهد اللّي حتى حد ماهو باش يحبطني في تونس اللّي ولا فيها جلد للذات و نقولو منعرفو نعملو حتى شيئ و ماناش ناجحين بل بالعكس تونس ناجحة و أنا متفائل بتونس 15 - كل مستثمر أجنبي نقابلو يقلي المعمل هذا من أحسن ما عنّا، أمّا التعطيلات الإدارية مخلاتناش نزيدو نستثمرو
16 - بجرّة القلم اللّي حكيت علاها، تونس تنجم تتطور و تشد أولادها و تخلي أولادها يرجعولها
17 - هذا تشريف و تكليف لقيادة حزب افاق تونس و افاق تونس هو حزب سياسي من القلائل على معنى العمل على المدى المتوسط و البعيد و خدم مع برشا كفاءات و عمرو ما شكك في وطنية و لا اسلام حد وعمرو ما تأذى منو حد و حارب على افكارو طيلة عشرة سنوات
18 - أنا و سي ياسين أصدقاء لكن نختلفوا في نقاط و نتناقشو فيهم و اللّي يدخل لحزب مش معناها لازم متفق معاهم 100% لكن يتنافش بالأرقام وبالحجة و يمكن يتبدل رأي الانسان
19 - ندائي اليوم هو لمّ شمل العائلة الوسطية، رغم اللّي الكلمة هاذي التوانسة معادش يحبوها و معادش يحبو ينخرطو في الأحزاب الوطنية و نوعدكم بالعمل و بلمّ الشمل، بأنّي نمد يدي للناس الكل، بالاستماع للرأي الاخر
20 - كان بامكاني تأسيس حزب اخر في تونس خاطرني مش متفق مع الاخرين، لكن انا نؤمن اللّي لازم تنخرط في حزب موجود و الأحزاب بيدها في وسطها توجهات لكن فما أرضية وحدة تجمعهم.
21 - أنا متحمس للمرحلة المقبلة، وان شاء الله كلامي يلقى صدى، وباش نخدموا مع بقية الأحزاب السياسية، مع المنظمات الوطنية، مع الشباب، مع الجهات، باش نكملو اللّي بداوه كوادر الحزب
22 - مانيش باش نبدى من ورقة بيضاء خاطر لا أؤمن ب"الزعماء" اللّي يفسخ اللّي قبلو و يقول باش نبدى من الأول، بل بالعكس باش نبنيو على الحاجات الباهين ونصلحو الأغلاط و نشكر ياسين على شجاعتو،. على تواضعو، على تقاليد تسليم الحكم و على تحمّلو للمسؤولية و مش غريب على انسان وطني كيما ياسين
23 - النخبة ينجم يكون عندها امتداد شعبي، وقت تعرف تحكي مع التوانسة اللّي فدّوا من الخطابات التقليدية
24 - عاشت تونس حرّة مستقلّة أبد الدهر، عاشت تونس ديمقراطية، عاشت تونس مزدهرة
