الدورة 41 من مهرجان القاهرة السينمائي (دورة يوسف شريف رزق الله)..

كتبه 
Published: 03 تشرين2/نوفمبر 2019
30 مرات

النهارده ناقص شهر بالظبط على الدورة 41 من مهرجان القاهرة السينمائي (دورة يوسف شريف رزق الله).. وإلى الآن المهرجان أعلن رسميًا عما يلي: -

تكريم المخرج العالمي تيري جيليام.. واحد من أعظم الفنانين الأحياء.. واللي زي كل ضيوف المهرجان هيستلم التكريم ويعمل ماستر كلاس يتكلم فيه عن تجربته.. لأننا قفلنا الباب تمامًا في وجه فكرة إن شخص يحضر عشان يتصور على السجادة الحمراء والمسرح ويروح من غير ما يكون فيه فرصة للمجتمع السينمائي المحلي (جمهور وصحافة) إنهم يقابلوه.

- الاستمرار في الأقسام الجديدة الثلاثة التي قدمها المهرجان في العام الماضي (الواقع الافتراضي، عروض منتصف الليل، الجالا)، والأخيرة زاد عددها بزيادة عدد عروض السجادة الحمراء في كل ليلة من ليالي المهرجان لعرضين بدلا من عرض واحد. - الانضمام لمبادرة 5050 في 2020 العالمية للمهرجانات.. والمهتمة بالشفافية في نسب تمثيل المرأة في فريق البرمجة واختيارات المهرجان..

لنكون أول مهرجان عربي (الوحيد في حقيقة الأمر) الذي ينضم لمبادرة انضم لها كل مهرجانات الصف الأول في العالم..

مع العلم إن الالتزام الوحيد هو الشفافية في الإعلان عن الأرقام.. دون أي تدخل أو أي كوتا يجب على المهرجان تحقيقها.. لأن معيار الاختيار الأول والأخير بالنسبة لنا هو الجودة والمستوى الفني. - توسعة المسابقة العربية من 8 إلى 12 فيلم، وافتتاحها بواحد من أهم الأفلام العربية في العام (بيك نعيش لمهدي برصاوي)، وبشكل عام الدورة 41 ستشهد أكبر مشاركة عربية في أي مهرجان بالمنطقة على الإطلاق منذ توقف مهرجان دبي، وأقصد المشاركة بالأفلام وليس بعدد الضيوف، والفارق كبير.

- استمرار أيام القاهرة لصناعة السينما بأنشطة متنوعة للمتخصصين ومحترفي الصناعة، أعلن منها حتى الآن ورشتي سكرين باز وإيافي. - لأول مرة في تاريخ المهرجان عدد العروض العالمية والدولية الأولى بلغ رقم غير مسبوق.. أعلنا عن 27 فيلم منهم 20 فيلم طويل، والرقم زاد حاليًا وهنعلنه بدقة يوم المؤتمر الصحفي.

- 16 مشروع مصري وعربي ستشارك في ملتقي القاهرة السينمائي وتتنافس على جوائز قيمة جدا.. الملتقى أثبت أهميته بالفعل ورجوعه بالفايدة على الأفلام وعلى المهرجان.. بدليل إن 3 أفلام شاركت في دورات سابقة منه موجودة في برنامج السنة..

منهم فيلم في عرضه العالمي الأول والثاني في عرضه الدولي الأول. - خلق شكل جديد لقسم البانوراما الدولية اللي بيضم 50 من أهم أفلام السنة.. بعمل برامج نوعية داخله.. هنبدأها بخمس أفلام عن خمس صناع سينما عظماء بعنوان "بانوراما خاصة: مواهب سينمائية"..

برنامج مخصص لعشاق الميتاسينما (الأفلام عن الأفلام). - فيلم الافتتاح.. الفيلم الأكبر والأكثر ترقبا في السنة "الأيرلندي" لمارتن سكورسيزي.. في عرضه الأول بالمنطقة.. واللي بيخلي مهرجان القاهرة الوحيد في المنطقة العربية اللي شبكة نتفلكس تخصه بالثقة في عرض أفلامها.. وتحديدا أكبر أفلامها كل سنة.. بعد ما عرضنا "روما" العام الماضي. - داخل نفس البيان تمت الإشارة لرقم تاني بيتحقق لأول مرة في تاريخ المهرجان.. وهو إن 90 فيلم على الأقل خصت المهرجان بعرضها الأول في الشرق الأوسط وشمال أفريقيا..

ودول غير ال30 العروض الأولى.. بمجموع حوالي 120 فيلم.. رقم مفيش مهرجان في المنطقة كلها حققه قبل كده. أهم حاجة بقى.. إن كل المعلن ده لا يشكل حتى نصف محتوى الدورة.. اللي كل الفريق مصمم إنها تخرج بصورة تليق بحملها اسم يوسف شريف رزق الله.. رمز المهرجان التاريخي وأحب الناس لقلوبنا جميعًا.. الأيام الجاية فيها إعلانات ومفاجآت كتير لحد المهرجان.. مهرجان القاهرة بيتغير كل يوم للأفضل..

وبياخد المكانة اللي ميصحش يكون فيه أي مهرجان آخر بينافسه عليها.. بدعم ومساعدة ومحبة كل الصناعة وكل الصحافة تقريبا.. واللي الأيام أثبتت إنهم مستعدين فعلا يتحمسوا ويدعموا ويدافعوا طالما شايفين إن الصح بيحصل. ربنا يكملها على خير.. ونتقابل بعد شهر في دار الأوبرا المصرية باذن الله

رأيك في الموضوع

تأكد من ادخال المعلومات في المناطق المشار إليها ب(*) . علامات HTML غير مسموحة